ប្រែសម្រួល៖ស-សម្បត្តិ

កងកម្លាំងអ៊ុយក្រែនបានឆ្លើយតបទៅនឹងកិច្ចខិតខំប្រឹងប្រែងរបស់រុស្ស៊ីក្នុងការបណ្តេញពួកគេចេញពីផ្នែកមួយនៃទឹកដីរុស្ស៊ី ដោយចាប់ផ្តើមបើកការវាយប្រហារជាច្រើនលើតំបន់ព្រំដែនមួយផ្សេងទៀត ដោយប្រើប្រាស់ដ្រូន កាំភ្លើងធំ និងកងទ័ព។

ភូមិជាង ២០ នៅក្នុងតំបន់ប៊ែលហ្គោរ៉ូដរបស់រុស្ស៊ី — ដែលស្ថិតនៅក្នុងដីដែលមានប្រវែង ១៥០ គីឡូម៉ែត្រ (៩០ ម៉ាយ) តាមបណ្តោយព្រំដែនអ៊ុយក្រែន — បានរងការវាយប្រហារ យោងតាមអភិបាលនៃតំបន់ វីយ៉ាឆេស្លាវ ហ្គ្លាដកូវ។ កងទ័ពអ៊ុយក្រែនមិនបានទទួលស្គាល់ប្រតិបត្តិការនេះជាផ្លូវការនៅឡើយទេ។

ការវាយប្រហារដោយកងកម្លាំងអ៊ុយក្រែនហាក់ដូចជា ជាការឆ្លើយតបទៅនឹងការខាតបង់ថ្មីៗរបស់ពួកគេក្នុងតំបន់ឃឺសក៍របស់រុស្ស៊ី ដែលនៅជាប់នឹងប៊ែលហ្គោរ៉ូដ ដែលពួកគេបានចូលកាន់កាប់ផ្ទៃដីជាង ១,០០០ គីឡូម៉ែត្រការ៉េកាលពីខែសីហាឆ្នាំមុន។ ក្នុងប៉ុន្មានសប្តាហ៍ថ្មីៗនេះ ការវាយប្រហារថ្មីរបស់រុស្ស៊ីដែលគាំទ្រដោយកងទ័ពកូរ៉េខាងជើងបានរុញពួកគេថយក្រោយទៅកាន់ព្រំដែនវិញ។

ទាំងរុស្ស៊ីនិងអ៊ុយក្រែនកំពុងស្វែងរកការរីកចម្រើននៅពេញផ្ទៃសមរភូមិប្រហែល ១,០០០ គីឡូម៉ែត្រ នៅពេលដែលអាកាសធាតុបានប្រសើរឡើង — និងនៅពេលដែលរដ្ឋបាលត្រាំកំពុងសង្កត់ធ្ងន់លើការបញ្ឈប់បាញ់។

ដោយលើកឡើងពីការវាយប្រហារតាមអាកាសនៅពេលយប់នៅក្នុងទីក្រុងដនីប្រូ ក្រីវី រីក និង “ទីក្រុងនិងសហគមន៍ផ្សេងទៀត” ប្រធានាធិបតីអ៊ុយក្រែន វ៉ូឡូឌីមៀរ សេឡេនស្គី កាលពីថ្ងៃសៅរ៍បានទាមទារការឆ្លើយតប “យ៉ាងខ្លាំង” ជាបន្ទាន់ពីសហរដ្ឋអាមេរិក ក្នុងសុន្ទរកថាពេលរាត្រីរបស់លោក។

“យើងរំពឹងទុកការឆ្លើយតប — ជាការឆ្លើយតបដ៏សំខាន់មួយ។ យើងកំពុងធ្វើការឆ្ពោះទៅរកការឆ្លើយតប” លោកបាននិយាយ ដោយពិពណ៌នាអំពីការវាយប្រហារដោយដ្រូនចំនួន ១៧២ លើកលើហេដ្ឋារចនាសម្ព័ន្ធស៊ីវិលរបស់អ៊ុយក្រែននៅយប់ថ្ងៃសុក្រ។ “ការឆ្លើយតបដ៏ខ្លាំងគឺចាំបាច់ជាបន្ទាន់ — ជាពិសេសពីសហរដ្ឋអាមេរិក ពីអឺរ៉ុប និងពីមនុស្សគ្រប់គ្នានៅលើពិភពលោកដែលបានដាក់ភ្នាល់លើការទូត។ រុស្ស៊ីត្រូវតែត្រូវបានបង្ខំឱ្យចូលសន្តិភាព — មានតែសម្ពាធទេដែលនឹងដំណើរការ” លោកបាននិយាយ។

អគ្គស្នងការកងទ័ពអ៊ុយក្រែនបាននិយាយថា ទាហានដែលកំពុងទទួលការព្យាបាលនៅមន្ទីរពេទ្យយោធាត្រូវបានរងរបួសក្នុងការវាយប្រហារដោយដ្រូនរុស្ស៊ីនៅក្នុងទីក្រុងខាគីវ ភាគឦសាននៅម៉ោងចុងក្រោយនៃថ្ងៃសៅរ៍។ មនុស្សពីរនាក់ត្រូវបានសម្លាប់ និងអ្នកផ្សេងទៀត ២៥ នាក់ត្រូវបានរងរបួសនៅកន្លែងផ្សេងទៀតក្នុងទីក្រុង។

• កងកម្លាំងអ៊ុយក្រែននៅលើជំហរចាញ់ប្រៀប

វាមិនច្បាស់ថាតើការវាយប្រហាររបស់អ៊ុយក្រែននៅប៊ែលហ្គោរ៉ូដមានបំណងយកនិងកាន់កាប់ដីរុស្ស៊ី ឬថាតើចលនានេះជាកិច្ចខិតខំប្រឹងប្រែងមួយដើម្បីកាត់បន្ថយសម្ពាធលើកងទ័ពអ៊ុយក្រែនដែលនៅក្នុងតំបន់ឃឺសក៍ និងនៅក្នុងតំបន់ស៊ូមីរបស់អ៊ុយក្រែនដែលនៅជាប់ដោយការបង្ខំឱ្យមានការដាក់ពង្រាយឡើងវិញនៃកងកម្លាំងរុស្ស៊ី។

មេបញ្ជាការកងទ័ពអ៊ុយក្រែន អូឡិកសាន់ឌឺ សៀរស្គី បាននិយាយកាលពីថ្ងៃព្រហស្បតិ៍ថា កងកម្លាំង   រុស្ស៊ីកំពុងព្យាយាមចូលទៅក្នុងតំបន់ស៊ូមី។ ហើយនៅថ្ងៃសៅរ៍ ក្រសួងការពារជាតិរុស្ស៊ីបានអះអាងថា កងទ័ពរបស់ខ្លួនបានយកតំបន់តាំងទីលំនៅតូចមួយនៅក្នុងតំបន់នោះ។

រហូតមកដល់ពេលនេះ ការវាយលុកចូលរបស់អ៊ុយក្រែនទៅក្នុងតំបន់ប៊ែលហ្គោរ៉ូដហាក់ដូចជាមានមហិច្ឆតាតិចជាងការវាយប្រហារទៅលើតំបន់ឃឺសក៍កាលពីឆ្នាំមុន។ យោងតាមមន្រ្តីរុស្ស៊ី វាបានចាប់ផ្តើមជិតពីរសប្តាហ៍មុន ជាមួយនឹងការវាយប្រហារឆ្លងព្រំដែនមួយចំនួន។

ទំហំនៃជោគជ័យរបស់អ៊ុយក្រែនរហូតមកដល់ពេលនេះនៅក្នុងតំបន់ប៊ែលហ្គោរ៉ូដមិនទាន់ច្បាស់លាស់នៅឡើយទេ។ ប្រភពរុស្ស៊ីក្រៅផ្លូវការនិយាយអំពីវត្តមានអ៊ុយក្រែនរាប់គីឡូម៉ែត្រនៅក្នុងប្រទេសរុស្ស៊ី។ អ្នកសរសេរប្លក់យោធារុស្ស៊ីម្នាក់បាននិយាយកាលពីថ្ងៃសៅរ៍ថា អ៊ុយក្រែនបានជោគជ័យក្នុងការចាប់ជើងនៅក្នុងភូមិប៉ូប៉ូវកានៅក្នុងតំបន់ប៊ែលហ្គោរ៉ូដ ហើយថា “ការប្រយុទ្ធយ៉ាងខ្លាំងនៅតែបន្ត” នៅទីនោះ។

កាលពីដើមសប្តាហ៍នេះ អ្នកសារព័ត៌មានទូរទស្សន៍រុស្ស៊ី អាណា ប្រូកូហ្វីយេវ៉ា ត្រូវបានសម្លាប់នៅក្នុងតំបន់ដូចគ្នា។

នៅកន្លែងផ្សេងទៀត កងកម្លាំងអ៊ុយក្រែនហាក់ដូចជានៅលើជំហរចាញ់ប្រៀបខ្លាំង។ នៅភាគខាងកើតនៃអ៊ុយក្រែន កងទ័ពរុស្ស៊ីនៅតែបន្តការវាយប្រហារយ៉ាងខ្លាំងក្នុងតំបន់ប៉ូក្រូវស្ក៍នៃដូនេតស្ក៍ — ក្នុងកម្រិតខ្ពស់បំផុតក្នុងឆ្នាំនេះ យោងតាមប្លក់អ៊ុយក្រែនក្រៅផ្លូវការ Deep State។ ប៉ុន្តែ Deep State បាននិយាយថា អ៊ុយក្រែនបានកាត់បន្ថយអត្រានៃការបាត់បង់ទឹកដីរបស់ពួកគេតាំងពីខែមករា។

ឆ្ពោះទៅខាងត្បូងបន្ថែមទៀតនៅក្នុងតំបន់សាប៉ូរីចយ៉ា ស្ថានភាពសម្រាប់អ៊ុយក្រែនកំពុងកាន់តែអាក្រក់ទៅៗ យោងតាមអ្នកនាំពាក្យកងទ័ពនៅទីនោះ វ្លាឌីស្លាវ វ៉ូឡូស៊ីន។ លោកបាននិយាយកាលពីថ្ងៃសុក្រថា ចំនួននៃការវាយប្រហាររបស់រុស្ស៊ី ដោយប្រើក្រុមទាហានថ្មើរជើងតូចៗ “បានកើនឡើងយ៉ាងច្រើន”។

វីដេអូដែលមានទីតាំងភូមិសាស្ត្របង្ហាញថា រុស្ស៊ីបានចូលទៅក្នុងទីក្រុងឆឺរបាគី។ ទីក្រុងនេះត្រូវបានអះអាងដោយក្រសួងការពារជាតិរុស្ស៊ីនៅថ្ងៃសៅរ៍។ ប្លក់រុស្ស៊ីមួយបាននិយាយអំពីការប្រយុទ្ធដ៏ខ្លាំងនៅក្នុងតំបន់នោះ។

អ្នកបកស្រាយយោធាអ៊ុយក្រែនម្នាក់បានទទួលស្គាល់ការរីកចម្រើនរបស់កងទ័ពរុស្ស៊ីនៅក្នុងតំបន់នោះ ដែលនៅជាប់នឹងផ្លូវជាតិសំខាន់មួយ ទោះបីជាគាត់បានកត់សម្គាល់ថាមានការបាត់បង់ដ៏ច្រើនរបស់កងទ័ព។

កុន​ស្តង់ទីន ម៉ាសូវេតស៍ ជាអ្នកវិភាគយោធាអ៊ុយក្រែនម្នាក់ទៀត បានប៉ាន់ប្រមាណថា រុស្ស៊ីបានប្រមូលកងទ័ពដល់ទៅ ៧០,០០០ នាក់តាមបណ្តោយសមរភូមិសាប៉ូរីចយ៉ា បូកបញ្ចូលទាំងរថក្រោះនិងកាំភ្លើងធំរាប់រយដើម។

គ្រឹមឡាង់កាន់កាប់ប្រមាណបីភាគបួននៃតំបន់សាប៉ូរីចយ៉ា ហើយបានប្រកាសដោយខុសច្បាប់អំពីការប្រមូលផ្តុំទាំងស្រុងរបស់វា។

• ការរីកចម្រើនតិចតួចឆ្ពោះទៅរកការបញ្ឈប់បាញ់

ការចរចាអំពីការបញ្ឈប់បាញ់មានកម្រិត ដែលមានការសម្របសម្រួលដោយមានសំឡេងខ្លាំងៗពីសហរដ្ឋអាមេរិក កំពុងធ្វើឱ្យមានការរីកចម្រើនតិចតួច។ គ្រឹមឡាង់បានបន្ថែមលក្ខខណ្ឌជាច្រើនសម្រាប់ការបញ្ឈប់បាញ់នៅក្នុងសមុទ្រខ្មៅ ដែលមិនអាចទទួលយកបានទាំងសម្រាប់អ៊ុយក្រែន និងសម្ព័ន្ធមិត្តអឺរ៉ុបរបស់ខ្លួន។

ទីក្រុងម៉ូស្គូ និងទីក្រុងគីវ ចោទប្រកាន់គ្នាទៅវិញទៅមកអំពីការកំណត់គោលដៅលើហេដ្ឋារចនាសម្ព័ន្ធថាមពល ទោះបីជាមានកិច្ចព្រមព្រៀងកាលពីដើមខែនេះថាពួកគេនឹងឈប់ក៏ដោយ។ អ្នកនាំពាក្យគ្រឹមឡាន់ ឌីមីទ្រី ប៉េសកូវ បាននិយាយកាលពីថ្ងៃសុក្រថា “រុស្ស៊ីរក្សាសិទ្ធិមិនគោរពតាមការហាមឃាត់ការវាយប្រហារលើវិស័យថាមពល ដែលគីវរំលោភជាប្រចាំ”។

អ្នកចរចារុស្ស៊ីម្នាក់បាននិយាយកាលពីថ្ងៃសុក្រថា គាត់មិនរំពឹងថាកិច្ចព្រមព្រៀងបញ្ឈប់បាញ់ជារួមនឹងមានរហូតដល់យ៉ាងហោចណាស់ដល់ចុងឆ្នាំនេះទេ។ ហ្គ្រីហ្គូរី ការ៉ាស៊ីន បាននិយាយថា ការចរចានៅទីក្រុងរីយ៉ាដ “មិនបាននាំឱ្យមានអ្វីដែលសំខាន់” ហើយ “វានឹងមិនមែនជារឿងងាយស្រួលក្នុងការរំពឹងទុកភាពរីកចម្រើនដ៏ខ្លាំងកាលា”។ ភាពរីកចម្រើន គាត់បាននិយាយ អាចត្រូវបានរំពឹងទុកល្អបំផុតនៅចុងឆ្នាំ។

សេឡេនស្គីបានអះអាងថា រុស្ស៊ីមានគម្រោងធ្វើការវាយប្រហារច្រើនជ្រុងក្នុងប៉ុន្មានសប្តាហ៍ខាងមុខដើម្បីទទួលបានការរីកចម្រើនផ្នែកទឹកដីមុនការចរចាបញ្ឈប់បាញ់បន្ថែមទៀត។

“ពួកគេកំពុងអូសបន្លាយការចរចាហើយព្យាយាមធ្វើឱ្យសហរដ្ឋអាមេរិកជាប់គាំងក្នុងការពិភាក្សាដែលគ្មានទីបញ្ចប់និងគ្មានន័យអំពី ‘លក្ខខណ្ឌ’ ក្លែងក្លាយ គ្រាន់តែដើម្បីទិញពេលវេលាហើយបន្ទាប់មកព្យាយាមដណ្តើមយកដីបន្ថែមទៀត” សេឡេនស្គីបាននិយាយកាលពីថ្ងៃព្រហស្បតិ៍ក្នុងដំណើរទស្សនកិច្ចទៅទីក្រុងប៉ារីស។ “ពូទីនចង់ចរចាអំពីទឹកដីពីជំហរដ៏ខ្លាំង”៕

ប្រភព៖ CNN